Lífshlaupið 2021

Það er okkur sönn ánægja að tilkynna að Framhaldsskólinn á Húsavík varð í 1. sæti fyrir flestar mínútur og 1. sæti fyrir flesta daga í Lífshlaupinu 2021.

Við erum afar stolt af okkar fólki.

Nemendur skólans eru einstaklega duglegir við að stunda daglega hreyfingu og skrá hana niður á síðu Lífshlaupsins undir leiðsögn Selmdísar Þráinsdóttur sem heldur utan um verkefnið. Framhaldsskólinn á Húsavík hefur oft unnið til verðlauna í Lífshlaupinu en verkefnið er á landsvísu.

Í Lífshlaupinu eru landsmenn allir hvattir til þess að huga að sinni daglegu hreyfingu og auka hana eins og kostur er þ.e. í frítíma, vinnu, í skóla og við val á ferðamáta. Í ráðleggingum Embættis landlæknis um hreyfingu er börnum og unglingum ráðlagt að hreyfa sig í minnst 60 mínútur á dag og fullorðnum í minnst 30 mínútur á dag.

Í ár var slegið þátttökumet en alls tóku 22.635 landsmenn þátt. Það eru 4.441 fleiri en í fyrra og er almenningsíþróttasvið ÍSÍ ótrúlega ánægt með þessa aukningu því hún segir okkur að Lífshlaupið skiptir máli.

Við óskum nemendum okkar innilega til hamingju með sigurinn !