2005

20. desember 2005

Annarlok í FSH

Í dag lauk haustönninni með síðasta umsjónartíma og prófsýningu. Fimm nemendur luku stúdentsprófi og munu útskrifast formlega með félögum sínum í vor. Þessir nemendur eru: Guðrún Einarsdóttir, Karl Hannes Sigurðsson, Grétar Björnsson, Heiðar Halldórsson og Alma Lilja Ævarsdóttir en hana vantar á myndina.

15. desember 2005

Ína Valgerður áfram í Idolinu !

Eins og við erum flest búin að frétta þá komst Ína Valgerður okkar áfram í Idolinu á föstudaginn. Fjölmennt var á Fosshótel Húsavík þetta kvöld og var mikill fögnuður, þegar í ljós kom að Ína Valgerður hefði fengið næst flest atkvæði.

06. desember 2005

Dálkurinn kominn út !

Nú er komið út fréttablað starfsbrautar FSH sem nefnist Dálkurinn. Það er glæsilegt 10 síðna litprentað blað. Nemendur á starfsbraut hafa verið að vinna að blaðinu í vetur sem hluta af íslenskunámi sínu.

01. desember 2005

1. desember haldinn hátíðlegur í skólunum

Í tilefni af 1. des. komu nemendur og kennarar hér í skólanum saman í löngufrímínútunum í morgun og æfðu ættjarðarlög. Eftir hádegið kl. 13:00 komu nemendur allrar skólanna á Húsavík saman í íþróttahöllinni og héldu upp á daginn með upplestri og söng.

01. desember 2005

Hópverkefni í lífsleikni

Nemendur í áfanganum lífsleikni hafa unnið mörg fjölbreytt verkefni á þessari haustönn.  Eitt af síðustu verkefnum sem nemendur gerðu var að semja kynningarbæklinga um ýmsilegt sem tengist  Húsavík.

25. nóvember 2005

Heimsókn til skrifstofu verkalýðsfélaganna

Nemendur í félagsfræði 103 ásamt Arnfríði Aðalsteinsdóttur kennara sínum brugðu sér af bæ í dag og heimsóttu skrifstofu stéttarfélaganna. Tilgangurinn var að fræðast um helstu hagsmunasamtök á íslenskum vinnumarkaði og hvaða hlutverki þau gegna.

23. nóvember 2005

Til Noregs í æfingabúðir

Einn af nemendum okkar, Stefán Jón Sigurgeirsson er mikill skíðamaður og er nú að fara í 4ra vikna æfingabúðir til  Geilo í Noregi. Hann fer þangað með úrvalshópi  unglinga á aldrinum 15-18 ára frá Skíðafélagi Akureyrar en þjálfari þeirra er Fjalar Úlfarsson.

15. nóvember 2005

Dagur íslenskrar tungu

Miðvikudaginn 16. nóvember er dagur íslenskrar tungu. Það er fæðingar dagur Jónasar Hallgrímssonar. Hér í framhaldsskólanum er dagsins minnst eins og í fleiri skólum. Nemendur í íslensku munu eftir löngufrímínútur lesa úr verkum Jónasar á göngum skólans.

02. nóvember 2005

Miðannarmat nýjung í FSH

Á þessu skólaári er tekin upp sú nýbreytni við FSH að allir nemendur fá svokallað miðannarmat. Það er gefið í heilum tölum eins og aðrar einkunnir skólans. Tilgangur miðannarmats er að auka enn þjónustu við nemendur og aðstandendur þeirra og gefa þeim upplýsingar um stöðu nemandans í hverri námsgrein eftir að námsönn er hálfnuð.